Efa manomana sahady ny taona manaraka ny Printemps des Poètes taorian'ny andiany 2026 nifantohana tamin'ny fahafahana. Hotanterahina ny 8 ka hatramin'ny 31 marsa 2027 ny andiany manaraka amin"ity hetsika lehibe natokana ho an'ny tononkalo ity izay niorina tamin'ny taona 1999.
Nosafidina ny lohahevitra "Ny tononkalo: tontolo fandraisana andraikitra" mba hampahatsiahivana fa tsy resaka endrika, fahatsapana na vakoka ara-kolontsaina ihany ny tononkalo, fa tena firotsahana an-tsehatra, fanehoana fijery momba izao tontolo izao ary fandraisana anjara mavitrika eo anivon'ny fiarahamonina.
________
Mihevitra ho nahataona olona maherin'ny 20 tapitrisa, na mivantana na ankolaka, tamin'ny alalan'ireo hetsika nokarakarainy ny Printemps des Poètes andiany 2026. Nisandrahaka manerana an'i Frantsa sy firenena 44 hafa eran'izao tontolo izao izany, tamin'ny alalan'ny fihaonana sy famakiana tononkalo an'arivony, fampielezan-kevitra, fampirantiana, hetsika an-tsekoly ary loharano nomerika maro.
Mikendry ny hanohy izany fahombiazana izany kosa ny andiany 2027 amin'ny fandinihana ireo endrika isan-karazany isehoan'ny herin'ny tononkalo eo amin'ny fanabeazana, kolontsaina, fiarahamonina, tontolo iainana, demokrasia, fiainana anaty, ary zavakanto.

Olona maherin'ny 20 tapitrisa no voakasika

Nahasarika hetsika an'arivony tao Frantsa sy tany amin'ny firenena 44 hafa ny Printemps des Poètes andiany 2026. Nahavitana fitetezana ho an'ny tononkalo koa izany ka nahatontosana fanentanana goavana miisa 15 tamin'ny faritany, nasionaly sy iraisam-pirenena, ankoatra ireo hetsika miisa 139 nokarakarain'ireo mpiara-miombon'antoka sy ny ekipan'ny Printemps des Poètes mivantana, manerana an'i Frantsa sy any ivelany.

Nanome voninahitra poeta 254 ny boky angon-tononkalo (anthologies) miisa telo, navoaka niaraka tamin'ny Printemps des Poètes:

• Chemins de liberté. L'année poétique : 121 poètes d'aujourd'hui, navoakan'ny Seghers;
• Liberté – Visas pour un monde ouvert, navoakan'ny Bruno Doucey;
• Mes premiers poèmes pour la liberté, l'égalité et la fraternité, navoakan'ny Rue du monde.

Nanolotra boky angon-tononkalo marolafy ho an'ireo mpikarakara tetikasa ihany koa ny Printemps des Poètes izay milohateny hoe Liberté, ary ahitana tononkalo amin'ny endrika nomerika sy horonantsary poetika fohy (capsules poétiques) miisa 40, novakin'ireo olo-malaza avy amin'ny tontolon'ny kolontsaina.

Nampitain'ny Délégation générale à la langue française et aux langues de France, ny INDIGO, ny Nolinski Paris, ary ny Union nationale des fleuristes ireo votoaty ireo ka nahafahan'ny besinimaro nisitraka sy nizara azy bebe kokoa.

Nanome vahana ny endriny ara-nomerika koa ny hetsika, ka nahatratrarana takila 1,5 tapitrisa nojerena tao amin'ireo loharanom-pahalalana momba ny tononkalo hita ao amin'ny tranonkalany.

Sekoly, tanàna, peta-drindrina: tononkalo avokoa

Nahasarika fatratra ny tontolon'ny fanabeazana ny Printemps des Poètes 2026. Sekoly ambaratonga fototra sy kolejy ary lisea tsy tambo isaina no nandray anjara tamin'ny hetsiky ny volana marsa, ary Écoles en Poésie miisa 673 kosa no nanohy ny firobohany tao anatin'ny tontolon'ny haisoratra.

Niorina ihany koa tamin'ny fiaraha-miasan'ireo Villes et Villages en Poésie miisa 145 ny hetsika, ka nahakasika mponina manodidina ny 2,8 tapitrisa.

Natolotra ho an'ireo tanora 4 tapitrisa voasoratra anarana ao amin'ny Pass Culture ihany koa ireo loharanom-pahalalana natokana ho an'ny tononkalo ankehitriny.
Tao Paris, mponina 4 tapitrisa no nasaina hihaona amin'ny tontolon'ny tononkalo tamin'ny alalan'ny peta-drindrina fanentanana niarahana tamin'ny Kaominin'i Paris.

Tao amin'ny faritra Île-de-France, mpandeha 8 tapitrisa isan'andro no nianoka tononkalo noho ny fanentanana niarahana tamin'ny RATP (Régie Autonome des Transporrs Parisiens).

Nanentana olona 8 tapitrisa ny hetsika Poésie en sous-sol (tononkalo ambanin'ny tany) niarahana tamin'ny INDIGO, nampahafantarana ny tononkalo klasika sy ankehitriny ho an'ireo mpampiasa toeram-piantsonan'ny fiara manerana an'i Frantsa.

Nisaoran'ny Printemps des Poètes i Isabelle Adjani reny mpiahy ny andiany 2026, ny poeta, ny mpikarakara ary ireo mpiara-misalahy 94.

Tononkalo : tontolo fandraisana andraikitra

Ho an'ny taona 2027, misafidy ny handinika ny tononkalo amin'ny maha herin'ny fandraisana andraikitra azy ny Printemps des Poètes. Miainga amin'ny eritreritra tsotra ny lohahevitra "Tononkalo: tontolo fandraisana andraikitra": poeta tsy mba mpialangalana. Atosany an-takila ny ampaham-piainany, ny fijeriny, ny fironany, ny fifandraisany amin'ny hafa sy amin'izao tontolo izao.

Araka izany, ampiasaina amin'ny fenitra maro samihafa ny tononkalo: fanabeazana, kolontsaina, fiarahamonina, tontolo iainana, demokrasia, fahasamihafana, fiainana anaty, finamanana, fitiavana, ary koa famoronana ara-javakanto.

Zary lasa fomba fiasa eo am-pelatanan'ny poeta ny soratra mba hiatrehana ireo antsoin'ny Printemps des Poètes hoe "rafitry ny haizina" izay miasa manodidina antsika. Raisina ho toy ny teny nomena tahaka ny fanoloran-tena ny tononkalo. Ary tahaka ny teny rehetra, afaka mamolavola ny zava-misy sy miasa ao amin'izao tontolo izao izy.

Hetsika teraka tamin'ny taona 1999

Natsangan'i Jack Lang tamin'ny taona 1999, niaraka tamin'i Emmanuel Hoog, teo ankilan'ny poeta André Velter, ny Printemps des Poètes. Hetsika lehibe indrindra atokana ho an'ny tononkalo any Frantsa izy ankehitriny. Nifandimby nitantana azy i Alain Borer, Jean-Pierre Siméon, ary Sophie Nauleau. Nandrindra ny hetsika hatramin'ny volana jolay 2024 i Linda Maria Baros. Tontosaina mandritra ny volana marsa isan-taona ny Printemps des poètes izay mampiako ny tononkalon'ny anio amin'ny vakoka ara-tononkalo.

Miely patrana manerana an'i Frantsa sy any amin'ny firenena miisa 44 ny hetsika. Miantehitra amin'ny poeta ny heriny, miampy ireo tambajotra midadasika ahitana sekoly, oniversite sy ivon-toeram-pampianarana ambony, vondrom-bahoakam-paritra, fivarotam-boky, tranomboky, trano famoaham-boky, teatra, tranon'ny tononkalo, tranom-bakoka, tsangambato nasionaly, fikambanana ary ivon-kolontsaina.

Ao amin'ny Bibliothèque de l'Arsenal, 1 Rue de Sully, 75004 Paris, no foiben'ny Printemps des Poètes 2027 izay hotanterahina ny 8 ka hatramin'ny 31 marsa 2027.

Toetra Ràja