Tsikimilamina Rakotomavo
Miarahaba anao Raharintsoratra. Manitikitika ahy sahady ny tantaran'izany solon'anarana izany.

‎Raharintsoratra
Salama tompoko! Ny hoe "Raharintsoratra" dia avy amin'ilay anarako hoe: RAHARINTSOAMAMPITA = RAHARIN(TSO) + SORATRA. Nosafidiko manokana io solonanarana io ho fanehoana  ny fiainako tanteraka ao anatin'ny soratra.
‎
‎Tsikimilamina Rakotomavo
Inona no mampiavaka anao amin'ny Poeta hafa?

‎Raharintsoratra
Ny mampiavaka ahy amin'ny poeta? Ny mpankafy sy ireo mpandinika ny asasoratro angamba no tena mahita an'izay fiavahako izay. Ny tsapako fotsiny izao dia eo amin'ny fotoana hahatongavan'ny aingam-panahy. Misy vanimpotoana maharitraritra aho tena tsy manoratra mihitsy indrindra rehefa tratran'ny rotoroton'ny fianarana. Misy kosa anefa ao anatin'ny herinandro tena manoratra tsy ankijanona na andro na alina ary tena mahavita miari-tory.

‎Tsikimilamina Rakotomavo
Aminao inona no atao hoe talenta?
‎
‎Raharintsoratra
Amiko, "ny atao hoe talenta dia ilay fahaiza-manao ananan'ny olona iray izay tsy itambarany amin'ny hafa fa  manavaka azy ao anatin'ny maro, toy ny pentina mainty eo anivon'ny taratasy fotsy iray".
‎
‎Tsikimilamina Rakotomavo
Raha hamaritra ny Poeta sy ny anjara toerany ianao dia ahoana no azonao ambara?

‎Raharintsoratra
Amiko, "Ny poeta dia ilay olona miaina ny fiainan'izao tontolo izao (miaina ny fiainan'ny olombelona, ny zava-boahary hita maso na ny tsy hita, fiarahamonina ary firenena) ka mahay mamoaka izany amin'ny amin'ny sora-kanto."
‎
Tsikimilamina Rakotomavo
Mpanoratry ny ankehitriny ianao. Inona no tena mampiavaka izany sokajy izany?

Raharintsoratra
Amin'ny maha mpanoratry ny ankehitriny ny tena, ny mampiavaka ny mpanoratra ankehitriny dia efa maro ny sehatra hahafahany maneho ny asasorany. Ankoatra ny fisian'ny fikambanana maro dia manampy betsaka amin'ny fampirantiana ny asasorany ihany koa ny fisian'ny tambazotran-tserasera izay mampifandray kokoa ny mpanoratra sy ny mpamaky satria afaka maneho ny heviny ao amin'ny taria ny mpamaky mizara izay fitsapana azony mikasika ny rantin'asasoratra iray (Na izy mankafy na mitsikera). Izany dia manampy betsaka ny mpanoratra eo amin'ny fanatsarana hatrany ny asasorany ary tsy misy elanelany be toy ny taloha ny mpanoratra sy ny mpamaky ankehitriny.
‎
‎Tsikimilamina Rakotomavo
Hafa mihitsy ny fihetsikao rehefa miantsa tononkalo. Afaka manome tononkalonao iray tena nandona anao izay namorona azy ve ianao?

‎Raharintsoratra
Maro ny asasoratro fa ity tononkalo iray ity no tena nandona fon'olona maro be angamba:
‎
‎MBA ANESORY IRAY SEGONDRA NY MANDRAKIZAINAO
‎
‎E! Tsy maintsy ho avy marina tokoa moa izany kay
‎Fa ho tojo ny tena tianao ianao e?
‎Dia amin'izay fotoana izay,
‎voafafa mora foana ny lasantsika rehetra
‎Dia tsy tianao ho tsaroana ny fiaraha-nitoetra teo am-parafaranao
‎Kanefa raha mba mety,
‎anesory iray segondra ny mandrakizainao
‎Dia ivereno hitoerana ilay fipetrahantsika.
‎
‎Dia 'lay daty nokaloina tsy hohadinoina,
‎Novanao daty vaovao
‎Daty vaovaonao sy ilay olon-tianao
‎E! Sambatra ianareo
‎Kanefa raha mba mety,
‎anesory iray sengondra ny mandrakizainao
‎Dia tsarovy indray mitopy ny tsara izay mba vitako,
‎Izay vao hadinoy
‎
‎Satrinao  handalo ny lalana falehantsika dia
‎hotakonanao dian-tongo-baovao,
‎ilay dian-tongotro iny
‎tsy ho hitanao intsony
‎E! Voafafanao ny lasako
‎Kanefa raha mba mety,
‎anesory iray segondra ny mandrakizay
‎Dia alaivo sary an-tsaina ny tongotsika roa niray lalana fahiny
‎Rehefa vita izay,
‎tsy maninona fafao
‎
‎Raha mba mety re Rahavako, italahoako ianao
‎Tsy maintsy ianao ho sambatra amin'ny fiainam-baovao
‎ Fa 'lay sariko any re e!
‎ Aza mba fafana
‎Aza mba fafana na tsy hojerenao intsony aza
‎Kanefa raha mba mety, anesory iray segondra ny mandrakizainao
‎Dia mba banjino farany,
‎Alohan'ny handrovitanao azy
‎Anesory iray segondra ny mandrakizainao
‎Dia mba atero mora eo an-doham-parafarako eo ilay sary rovidrovitra
‎
‎Mba anesory iray segondra ny mandrakizainao
‎Dia mba banjino farany ilay efitranoko
‎Sina sady moana
‎Fa ao ny tandindiko, miandry anao rahavako
‎Mba anesory iray segondra ny mandrakizainao
‎Hitondranao raozy mavo eo an-doham-pasako
‎Mba hinoako tsara f'efa
‎tsy mila ahy intsony ianao
‎
‎Mba anesory iray segondra ny mandrakizainao
‎Dia mba tsofy rano, handry
‎am-piadanana  ity nofo hody vovoka
‎Mba anesory iray segondra ny mandrakizainao
‎Hisentoanao farany
‎        ‎Raharintsoratra, talata faha 06/07/21, 20:30

‎Tsikimilamina Rakotomavo
Inona no heverinao fa manavaka ireo tononkalonao?

‎Raharintsoratra
Ny hitako fa manavaka ny tononkaloko?
‎Ny ankamaroany dia saika tononkalo lava miendrika tantara mihitsy, azo atao tsara ny mamadika azy ho sombintantara na tantara foronina. Maro amin'ireo asasoratro no azo heverina ho mifampitohy mihitsy aza. Io izao dia misy tohiny fa saingy ilay olona nandefasana io tononkalo io no mamaly ilay izy.
Ny anisany mampiavaka ny tononkaloko ihany koa dia saika lasa ivon'ny tononkalo rehetra ny fiainana ny fihetseham-po mandona fo na dia tononkalom-pifaliana aza. Raha tononkalo maneho hafaliana dia mitoetra ho ivony foana ilay  "ranomasom-pifaliana". Raha tononkalon-katezerana dia mitoetra ho fanehoana ny hatezerana ny ranomaso ao anatin'ny asasoratra. Raha tononkalo fananarana dia hafa kokoa ny fananarana arahin-dranomaso amiko.
‎Dia saika toy izany avokoa ny hanasongadinana ireo karazana tara-kevitra maro be. Ny antony mbola baraingo amiko hatreto...?
‎
‎‎Tsikimilamina Rakotomavo
Mpampianatra ianao sady mpikaroka, inona no tolo-kevitrao hanatsarana ny fomba fampitana ny tononkalo ka hahatonga ny olon-drehetra hankafy azy miohatra amin'ny zava-kanto hafa?

‎Raharintsoratra
‎Amin'ny maha mpampianatra ny taranja malagasy sy maha mpikaroka ny tena, lafin-javatra maro no tsy maintsy takina mba hanatsarana ny fomba fampitana ny tononkalo ka hahatonga ny olon-drehetra hankafy azy miohatra ny amin'ny zava-kanto hafa:
‎1- Miainga avy any amin'ireo mpanoratra na poeta. Izy ireo no fototra mpanangana ny asasoratra ka takina amin'izy ireo araka izany ny hamoahana asasoratra tonga lafatra, mahafeno ny fepetra rehetra takina amin'ny zava-kanto na amin'ny endrika ivelany izany na anatiny. Mba hahatongavana amin'izany dia ilaina ny fifanakalozan-kevitra eo amin'ireo samy mpanakanto, famakiana ireo asasoratr'ireo zoky izay heverina fa manana ny lazany, ary indrindra ny finiavana miangaly ilay asasoratra mialoha ny hamoahana azy mba ho tena hambabo ny fon'ny mpamaky.
‎2- Ny fampiasana ny vokatry ny teknolojia. Efa tsy afa-miala intsony amin'ny vokatry ny teknolojia isika amin'izao fotoana ary io no sehatra mora ifandraisan'ny rehetra sy mora anapariahana azy na dia eo aza ny boky.
‎3- Avy amin'ny mpamaky. Na dia eo aza ny firoborobon'ny teknolojia dia mitaky mpamaky hanana ilay fo feno fankafizana ny tena zava-kanto feno fahendrena sy fanabeazana, anisan'izany ny asasoratra vokarin'ny poeta malagasy. Manampy betsaka mba hahitan'ny maro ilay asasoratra ny fanaovany fizarana ary azo atao tsara ny manasa ny namana rehetra ao amin'ny Fosaboky mba hitia sy hanaraka ilay pejin'ny mpanoratra/poeta  mamoaka ny asasorany.
‎4- Ny fandraisana andraikitra ataon'ny Ministera maro samihafa. Ny Fanjakana dia manana adidy ny amin'ny fampanomezan-danja ny zava-kanto ao aminy, anisan'izany ny asasoratra. Anisan'izany ny fanohanana ireo mpanoratra/Poeta amin'ny lafiny maro, ny fanomezana sehatra ny asasoratra (fisian'ny hetsika maro samihafa). Eo ihany koa ny fanentanany ny vahoaka ao aminy mba hahatsapa ny lanjan'izany asasoratra izany eo amin'ny fiainana iray manontolo.
‎
‎Tsikimilamina Rakotomavo
Satrintsika hitafa eto hatrany saingy voafetra ny fotoana. Misaotra anao nivahiny teto amin'ny Tapatapakahitra. Mandra-piresaka indray.

‎Raharintsoratra
Satry tokoa moa hitafa eto foana. Dia misaotra indrindra an'i Tsikimilamina Rakotomavo nanaiky ihany koa nandray ny tenako nivahiny teto. Misaotra indrindra nanome sehatra ho anay mpanakanto mba hahafahana manandratra ny asasoratra malagasy.
‎Mandra-pitafa indray tompoko!